Akizungumza na waandishi wa habari mjini Geneva kutoka Gaza ya kati, UNRWA afisa mkuu wa masuala ya dharura Louise Waterridge alionya kuwa huku kukiwa na njaa inayonyemelea katika Ukanda wa Gaza na majira ya baridi kali yanapokaribia, wale waliofurushwa kwa lazima wanalala sakafuni katika makazi ya muda yaliyozingirwa na maji taka.
"Tuna wasiwasi mkubwa wakati mvua inanyesha katika Ukanda wa Gaza, nini kitatokea kwa watu 500,000 ambao wako katika maeneo ya mafuriko?” Alisema.
Bi. Waterridge alisisitiza kuwa kiasi cha misaada inayoingia katika eneo lenye vita hivi sasa ni "cha chini zaidi katika miezi", na wastani katika Oktoba ya lori 37 pekee kwa siku kwa wakazi wote milioni 2.2.
Kulingana na UNRWA, hii inawakilisha karibu asilimia sita tu ya vifaa vya kibiashara na vya kibinadamu vilivyoruhusiwa kabla ya vita.
Tarehe ya mwisho ya misaada ya Marekani inaisha
Alipoulizwa kuhusu makataa ya Jumanne yaliyowekwa mwezi uliopita na Marekani kwa Israel kuboresha hali ya misaada katika eneo hilo ifikapo tarehe 12 Novemba, afisa huyo wa UNRWA alisema kuwa badala yake, "msaada umepungua".
Umoja wa Mataifa unaendelea kunyimwa ufikiaji wa kaskazini mwa Gaza ambako watu "wanaomba vipande vya mkate, maji", Bi. Waterridge alisema, akibainisha kuwa watu milioni 1.7 katika eneo hilo - asilimia 80 kamili ya watu - hawakupokea mgao wao wa chakula mwezi Oktoba.
Ijumaa iliyopita, wataalam wa usalama wa chakula kutoka Kamati ya Mapitio ya Uainishaji wa Awamu Iliyounganishwa ya Umoja wa Mataifa (IPC) ilitoa tahadhari juu ya njaa inayokaribia katika maeneo ya kaskazini mwa Ukanda wa Gaza.
Wakati mateso yanapoendelea kuwa mbaya zaidi, "watu wanapoteza matumaini", Bi. Waterridge alisema.
Wiki hii tu, misheni mbili kaskazini mwa Gaza ambayo alipaswa kushiriki ilikataliwa; lengo lilikuwa ni kutoa tembe za klorini na kutathmini vifaa kwa ajili ya makazi hayo.
"Hakuna mtu kutoka UNRWA ambaye ameweza kufikia kaskazini iliyozingirwa kwa zaidi ya mwezi mmoja," alisisitiza.
Kila saa inahesabu
Afisa huyo wa UNRWA alizungumzia "maombi na ushuhuda" kutoka kwa wafanyakazi wenzake wa Umoja wa Mataifa na kutoka kwa madaktari katika hospitali za kaskazini, ambazo zimeshambuliwa kwa mabomu. “Madaktari wanatuarifu kwamba wameishiwa na damu. Wamekosa dawa…Kuna miili mitaani,” alisema, akiongeza kuwa ambulensi "zimeacha kufanya kazi" na kwamba watu wanaweza kufika hospitalini peke yao, kwa mikokoteni ya punda.
"Wenzake wamekwama katika majengo ya makazi," hawawezi kuondoka, Bi. Waterridge alisema, wakati visima vinane vya maji vinavyoendeshwa na UNRWA kaskazini mwa Gaza Jabalia vimesitisha shughuli zao, na kuwaacha watu bila maji safi.
Afisa mkuu wa dharura wa UNRWA alikariri wito wa shirika hilo kwa mamlaka ya Israel upatikanaji wa maeneo yaliyozingirwa, ambayo ni "zaidi na muhimu zaidi kila saa sasa”.
Usitishaji vita pekee ndio utakaomaliza mateso
Mwishoni mwa mwezi uliopita, Bunge la Israel lilipiga kura ya kupiga marufuku UNRWA kufanya kazi nchini humo na kuwakataza maafisa kuwa na mawasiliano yoyote na shirika hilo. Sheria hizo zimewekwa kuanza kutumika siku 90 tangu kupitishwa kwao.
Alipoulizwa kuhusu ujumbe wowote ambao UNRWA wanaweza kuwa nao kwa Hamas, Bibi Wateridge alisema: “Wito wetu kwa Hamas pamoja na vikosi vya Israel ni usitishaji mapigano. Alisisitiza kwamba kundi la wanamgambo wa Kipalestina lilianzisha "mashambulio ya kutisha dhidi ya raia wa Israel tarehe 7 Oktoba", akiongeza kuwa ni jambo lisilokubalika kwamba vita viliendelea na raia kuteseka.
"Tumeona mateso ya kutisha ya raia wa Israeli, mashambulizi ya Oktoba 7, na kufuatiwa na mateso ya kutisha ya raia katika Ukanda wa Gaza. Kuna haja ya kuwa na usitishaji mapigano, kuachiliwa na kurudi kwa mateka nyumbani na hatimaye mapumziko kwa raia wote, sio tu katika Ukanda wa Gaza, lakini eneo jirani," alihitimisha.
