Գրոզնիում նոր թաղամաս կկոչվի Ռուսաստանի նախագահ Վլադիմիր Պուտինի անունով։ Այս մասին հայտարարել է Չեչնիայի ղեկավար Ռամզան Կադիրովը։ Նա փետրվարի 15-ին քաղաքի կենտրոնական հատվածում ծանոթացել է աշխատանքների ընթացքին։
«Այստեղ լայնածավալ շինարարական աշխատանքներ են ընթանում, որոնց ավարտից հետո կհայտնվի նոր թաղամաս։ Այն կրելու է մեր ազգային առաջնորդի, մեր ժամանակների ամենահայտնի քաղաքական գործչի՝ Ռուսաստանի նախագահ Վլադիմիր Պուտինի անունը»,- գրել է պարոն Կադիրովը Telegram-ում։
Նրա խոսքով, թաղամասը կգտնվի ավելի քան 200 հեկտար տարածքի վրա։ Այն կունենա 130 բնակելի թաղամաս, ինչպես նաև մզկիթներ, մանկապարտեզներ և սոցիալական ենթակառուցվածքի այլ օբյեկտներ։ Չեչնիայի ղեկավարը պնդում է, որ կառուցվող տների 40%-ի համար արդեն գնորդներ կան։
2008 թվականին Գրոզնիի կենտրոնական բուլվարը վերանվանվել է Պուտինի բուլվար։ Բացի այդ, Գրոզնիում կա չորս շրջան, որոնք 2020 թվականին Ռամզան Կադիրովի հրամանով վերանվանվել են ի պատիվ Չեչնիայի ազգային հերոսների՝ դրանք են Ախմատովսկի, Բայսանգուրովսկի, Շեյխ-Մանսուրովսկի և Վիզատովսկի շրջաններ։
