Прегратките им помагаат на жените да се справат со стресот, дури и ако е краток, бидејќи ги намалува реакциите на телото во исцрпувачки ситуации, објави Дејли мејл. Авторите на студијата од Универзитетот Рур во Бохум го објаснуваат ефектот на прегратките кај жените со тоа што тие повеќе уживаат во нив. Понежниот пол, исто така, произведува повеќе окситоцин, кој го потиснува производството на хормонот на стрес кортизол.
Студијата опфатила 76 парови на возраст од 18 до 32 години. Истражувачите ги мереле индикаторите за стрес како што се нивото на кортизол во плунката, крвниот притисок и промените на расположението. Стресниот настан бил потопувањето на раката во ледена вода. Според авторите, резултатите покажуваат дека „социјалниот допир може да биде тампон против стресот“. Претходните истражувања покажаа дека дури и држењето за рака може да го намали стресот кај жените. За многу луѓе, стресот предизвикува симптоми кои го попречуваат нивниот секојдневен живот - главоболки, стомачни проблеми, анксиозност, проблеми со менталното здравје, тешкотии со концентрирање. Некои стануваат раздразливи, нивниот сон и исхрана се менуваат. Експертите препорачуваат луѓето под стрес да разговараат со пријателите, роднините или со лекар или да прават вежби за дишење. Исто така, помага да се планира пред стресни настани.
