Тој доби 81.31 отсто од гласовите. Претседателот на Казахстан, Касам-Жомарт Токаев победи на вчерашните предвремени претседателски избори во најголемата земја во Централна Азија, пренесе АФП, повикувајќи се на прелиминарните резултати.
Шеесет и деветгодишниот Токаев, кој дојде на власт во 2019 година, освои 81.31 отсто од гласовите, покажуваат прелиминарните информации кои денеска ги објави Централната изборна комисија. Според нејзините податоци, излезноста на гласачите достигна 69.44%.
Очекувано, петте ривали на шефот на државата ја имаа улогата на статисти – ниту еден од нив не собра повеќе од 3.42%, забележува Франс прес.
Новина на изборите, опцијата „против сите“ беше изборот на 5.8 отсто од гласачите.
Богат со природни ресурси и лоциран на важна трговска раскрсница, Казахстан западна во хаос во јануари кога демонстрациите против цените се претворија во немири во кои загинаа 238 луѓе пред да бидат брутално задушени.
Земјата се уште е трауматизирана од оваа криза. Во знак дека тензиите не стивнуваат, властите минатата недела објавија дека уапсиле седум приврзаници на опозиционер во егзил под обвинение за поттикнување државен удар.
Централна тема во изборната кампања на Токаев беше неговиот проект за изградба на поправеден, „Нов Казахстан“. Сепак, економските тешкотии опстојуваат, како и авторитарните рефлекси на моќта.
Фотографија на Коневи