Виталиј Меринов, четирикратен светски шампион во кик-бокс, почина минатата недела во болница како последица на повреди на ногата здобиени додека се бореше за украинските вооружени сили во Луганск. Спортистот се приклучил на украинската армија како волонтер само неколку дена по почетокот на руската инвазија на Украина. За време на војната, тој беше назначен во Ивано-Франковск.
Градоначалникот Руслан Марцинков ја потврди смртта на 32-годишниот Меринов, кој зад себе остави сопруга и мало дете.
Властите во Киев процениле дека 262 украински спортисти загинале бранејќи ја својата татковина од руските агресори.
Поради оваа причина, украинската влада побара од Меѓународниот олимписки комитет (ИОК) да ги исклучи руските и белоруските спортисти од претстојните Олимписки игри што ќе се одржат во Париз следната година.
Меринов не е единствениот кик-боксер кој загина борејќи се со Русите – украинскиот светски шампион во кик бокс Максим Кагал загина во март минатата година во битката за Мариупол како дел од специјалните сили на страшниот „Азов баталјон“.
Микола Забчук, исто така кикбоксер, загина за време на руската инвазија. Меѓу другите познати украински спортисти кои ги загубија животите се фудбалерот Сергеј Баланчук, Људмила Черњецка (бодибилдинг), Александар Сербинов (атлетика), пренесува магазинот „Спортски ангели“. Станува збор за списание кое е создадено минатата година со помош на Комитетот за спорт на Украина за известување за состојбата на спортистите во земјата и кое досега ги објави сите случаи на загинати украински спортисти.