19-годишниот Луункиито нападнал говеда, а сточарите го убиле со копја
Див мажјак лав, кој се смета за еден од најстарите претставници на неговиот вид во светот, бил убиен од сточари во близина на националниот парк Амбосели во јужна Кенија, јави Би-би-си.
Луункиито (19) бил избоден со копја откако нападнал добиток за храна. Групата за заштита Лав Гардијан рече дека убиениот лав е најстариот во кенискиот екосистем, а можеби и во цела Африка, бидејќи лавовите обично живеат околу 13 години во дивината.
Портпаролот на Службата за диви животни во Кенија, Пол Џинаро, изјави за Би-Би-Си дека Луункиито е стар и немоќен и веројатно го напуштил националниот парк за да бара храна во селото.
Конзерваторите повикаа на построги мерки за заштита на дивиот свет и популацијата на лавови во Кенија.
„Ова е пресвртната точка за конфликтот меѓу човекот и дивиот свет и ние мораме да направиме повеќе како земја за да ги зачуваме лавовите кои се соочуваат со истребување“, рече Пола Кахумбу, конзерватор и главен извршен директор на WildlifeDirect.
Фото: LION Guardians/FACEBOOK
