Се верува дека бродолом од средното бронзено време, откриен во Кумлук, во близина на Анталија, на јужниот брег на Турција, е еден од најстарите познати потонати остатоци во светот. Претставува значајно откритие за подводната археологија од овој ран период.
Тим од 40 експерти предводени од професорот Хакан Јониз спроведуваат подводни ископувања на брегот на Анталија и неодамна открија нови реликвии кои припаѓаат на бродот и неговиот екипаж.
Користејќи напредна технологија и роботи, тие од бродот извадија 30 бакарни блокови тешки 1.5 тони, амфори и лични работи на морнарите, јавува Anadolu Agency (AA).
Подводни археолози опремени со специјален апарат макотрпно извлекоа артефакти од брод што потона пред 3,600 години на длабочина од приближно 50 метри.
На некои предмети им требаше еден месец за да се извлечат, користејќи мали алатки и вакуумски уреди за да се избегне оштетување на уникатните артефакти.
Наодите, особено бакарните инготи (одливки) што ја претставуваат валутата од тоа време, го истакнуваат богатото културно наследство на регионот, вклучувајќи ја и неговата улога во раната историја на поморската трговија и бродоградбата.
„Овој брод, кој веројатно беше натоварен со бакар од рудниците на островот Кипар, потона за време на бура на пат кон островот Крит“, рече Јониз.
„Ова се случи пред околу 3,550 до 3,600 години. Во овој контекст, бродоломот Кумлука од средното бронзено време сè уште ја носи титулата најстар трговски брод во светот“, додаде Ониз.
Сите обновени предмети минуваат низ процес на отстранување на сол во Регионалната лабораторија за реставрација и конзервација во Анталија.
Продолжува работата на еден од најстарите потонати бродови во светот, на голема длабочина, кој се очекува да открие повеќе уникатни артефакти од подводната археологија.
Фото: Нуркачи покрај еден од „најстарите познати бродоломи“, Анталија | АА
