Женските солзи содржат хемикалии кои ја блокираат машката агресија, покажа студијата на израелските научници, цитирана од електронското издание „Euricalert“.
Специјалисти од Институтот за наука Вајцман откриле дека солзите доведуваат до намалување на мозочната активност поврзана со агресија, што пак го ограничува таквото однесување кај претставниците на посилниот пол. Ефектот се јавува откако мажите ќе ги „помирисаат“ солзите.
Познато е дека машката агресија кај глодарите се блокира кога ги мирисаат солзите на женските примероци. Ова е пример за социјално хемосигнализирање, процес кој е вообичаен кај животните, но помалку чест - или помалку разбран - кај луѓето. За да видат дали го имаат истиот ефект кај луѓето, истражувачите го набљудувале влијанието на женските емоционални солзи врз група мажи кои учествувале во посебна игра за двајца. За потребите на анализата, на некои од волонтерите наместо солзи им бил даден физиолошки раствор.
Играта е дизајнирана да предизвика агресивно однесување против противникот за кој се смета дека мами. Кога ќе им се даде можност, мажите можат да му возвратат на конкурентот така што ќе го натераат да изгуби пари. Претставниците на посилниот пол не знаат што мирисаат и не можат да разликуваат солзи и физиолошки раствор, кои немаат мирис.
Според израелските податоци, агресивното однесување насочено кон одмазда за време на игра опаднало за повеќе од 40% откако мажите имале пристап до емотивните солзи на жените.
Во преиспитувањето со магнетна резонанца, функционалната снимка покажа два мозочни региони поврзани со агресија - префронталниот кортекс и предната изола. Тие се активираат кога мажите се испровоцирани во текот на играта, но не се активираат толку многу во истите ситуации кога претставниците на посилниот пол се под влијание на солзи. Згора на тоа, јасно е дека колку е поголема разликата во оваа мозочна активност, толку поретко противникот возвраќа во текот на играта.
Откривањето на оваа врска помеѓу солзите, мозочната активност и агресивното однесување сугерира дека социјалното хемосигнализирање е фактор на човечка агресија, а не само љубопитност на животните.
„Откривме дека, исто како и кај глувците, човечките солзи емитуваат хемиски сигнал што ја блокира машката агресија. Ова е во спротивност со идејата дека емоционалните солзи се уникатно човечки“, забележаа израелските научници, предводени од Шани Агрон.
Податоците од истражувањето се објавени во списанието со отворен пристап PLOS Biology
