Како што се приближува светиот пост Рамазан за муслиманите, екипите на општина Фатих во Истанбул извршија активности за чистење и дезинфекција во преобразената џамија Аја Софија.
Екипи на општинската дирекција „Заштита и контрола на животната средина“ ја исчистија внатрешноста и околината на историскиот објект.
Теписите беа вакумирани, држачите за чевли и внатрешноста на џамијата беа испрскани со средство за дезинфекција. Фонтаните за ритуално миење „аптест“, дворот на џамијата и плоштадот „Св. Софија“ беа измиени со топла вода и средство за дезинфекција.
По процесот на чистење внатре и надвор од џамијата беше посипана со розова вода, традиционален метод кој датира од времето на Отоманската империја.
Фатих Јилдиз, општински функционер задолжен за чистењето, рече дека џамијата била исчистена со тим од 20 луѓе, истакнувајќи: „Работата ќе продолжи во текот на Рамазан. Секоја вечер во светиот месец во џамијата ќе се попрскува розова вода. Целта е да се обезбеди почиста средина за богослужба за граѓаните кои ја посетуваат џамијата“.
Огромната „Махја“ – светлосните натписи со стотици светилки меѓу минарињата со натпис „Ла илаха илалах“ („Нема Бог освен Алах“) беше закачена помеѓу минарињата на Големата џамија Аја Софија.
Вековната традиција на Махја, која ги украсува џамиите за време на исламскиот свет месец Рамазан, од понеделник почна да се закачува во џамиите во Истанбул.
Кахраман Јилдиз, мајсторот на Махја, коментира: „Најголемите букви се во џамијата Аја Софија. Тешко е, но вреди да се вложи труд, бидејќи натписите се читаат од десетици метри. Тоа е всушност изработка и тешко е, напорна работа, но визуелно изгледа многу убаво“.
Света Софија е изградена во 532 година. Таа служела како црква 916 години. Таа била претворена во џамија во 1453 година по заземањето на Истанбул.
По основањето на Република Турција, историскиот објект бил музеј цели 86 години, но на 24 јули 2020 година, со одлука на претседателот Ердоган, официјално е повторно отворен за богослужба под името Големата џамија Аја Софија.
Во 1985 година Света Софија беше додадена на списокот на светско наследство на УНЕСКО.
Аја Софија е исто така меѓу најпопуларните туристички дестинации во Турција и останува отворена за локални и странски посетители.
Туристите плаќаат такса од 25 евра за посета на Света Софија Илустративна фотографија на Мерујерт Гонулу: https://www.pexels.com/photo/medieval-mosque-in-istanbul-city-6152260/
