Од следната учебна година предметот „Основи на православната култура“ повеќе нема да се изучува во руските училишта, предвидува Министерството за образование на Руската Федерација со наредбата од 19 февруари 2024 година.
Предметната област и предметот „Основи на духовната и моралната култура на народите на Русија“ се исклучени од федералниот државен стандард за основно општо образование.
Така, православието нема да биде посебен предмет за учениците од 5-то до 9-то одделение. Наместо тоа, некои теми ќе бидат вклучени во предметот „Историја на нашиот регион“ или локално знаење. Планирано е да се изработат „униформирани учебници по историја кои ќе се користат во сите образовни организации кои спроведуваат образовни програми за основно општо образование“, се вели во објаснувачката белешка на документот.
„Основи на православната култура“ беше задолжителен во руските училишта од 5-то до 9-то одделение, а во последното одделение имаше и испит по тој предмет. Главниот услов за темата беше да има „културен карактер“ и „да едуцира патриотски вредности“. Покрај православието, студентите можеа да учат и ислам, будистичка, еврејска култура или секуларна етика. Предметот беше воведен експериментално во 2010 година во некои региони, а од 2012 година стана задолжителен за сите руски училишта. Најголем број ученици (или нивните родители) го избрале предметот „Секуларна етика“, традиционално над 40%, а околу 30% од учениците го избрале православието.
Московската патријаршија одлучи да формира комисија за испитување на едностраната одлука на Министерството за образование „за усогласување на ставовите“.
