Con motivo dos seus saúdos o pasado 8 de maio, o presidente ruso Vladimir Putin asegurou que "como en 1945, a vitoria será nosa", multiplicando as comparacións entre a Segunda Guerra Mundial e o conflito de Ucraína.
Fixo os comentarios o domingo nunha mensaxe aos países do antigo bloque soviético e ás rexións separatistas do leste de Ucraína.
"Hoxe os nosos exércitos, como os seus antepasados, loitan ombreiro con ombreiro pola liberación da súa terra da inmundicia nazi, coa confianza de que, como en 1945, a vitoria será nosa", dixo Vladimir Putin. O presidente ruso engadiu que "por desgraza, hoxe, o nazismo volve levantar a cabeza", nunha pasaxe dirixida aos ucraínos.
"O noso sagrado deber é evitar que os herdeiros ideolóxicos dos derrotados" no que Moscova chama a "Gran Guerra Patria" "se vinguen".
Mentres, 60 persoas refuxiadas nunha escola da rexión de Lugansk están desaparecidas nun ataque ruso contra o edificio.
"As bombas golpearon a escola e, por desgraza, quedou completamente destruída", dixo o gobernador na súa conta de Telegram, citado por Le Monde. “Había un total de noventa persoas. Salváronse vinte e sete (...). O máis probable é que morran sesenta persoas que estaban na escola", di o gobernador.
Ese mesmo día os militares ucraínos atrincheirados durante moitas semanas nas galerías subterráneas da enorme siderurxia Azovstal en Mariupol anunciaron o domingo que non se renderían.
"A capitulación non é unha opción porque a Rusia non lle interesan as nosas vidas. Deixarnos vivos non lles importa", dixo Ilya Samoilenko, un oficial de intelixencia ucraíno durante unha rolda de prensa transmitida por vídeo.
"Toda a nosa comida é limitada. Quédanos auga. Quédanos munición. Teremos as nosas armas connosco. Loitaremos ata o mellor desenlace desta situación”, engadiu dende o soto do recinto industrial.
"Aquí temos uns 200 feridos. Temos moitos feridos, xente que non podemos deixar aquí. Non podemos deixar aos nosos feridos, aos nosos mortos, estas persoas merecen un tratamento axeitado, merecen un enterro axeitado. Non deixaremos a ninguén atrás”, continuou.
"Nós, militares da guarnición de Mariupol, fomos testemuñas dos crimes de guerra cometidos por Rusia, polo exército ruso. Nós somos as testemuñas”, engadiu Ilya Samoilenko, quen durante a conferencia falou unhas veces ucraíno e outras inglés.
