«Strauss House»-ը պարզապես թանգարան չէ. Դրանում տեղի կունենան համերգներ, իսկ ցանկացողները կարող են ստանձնել դիրիժորի դերը
Ավստրիայի մայրաքաղաքում իր դռներն է բացվել Շտրաուսների երաժշտական դինաստիային նվիրված նոր ինտերակտիվ թանգարանը, այս մասին հայտարարել է Վիեննայի զբոսաշրջության խորհուրդը դեկտեմբերյան մամուլի հաղորդագրության մեջ։
Այն հարգանքի տուրք է մատուցում ավստրիական հայտնի երաժշտական դինաստային։ Յոհան Շտրաուս-հայրը և նրա երեք որդիները մնում են աշխարհի երաժշտական հիշողության մեջ: Հանճարեղ արվեստագետների երկու սերունդները հարյուրավոր երթեր, պոլկա, վալսեր, մազուրկաներ, օպերետներ են ստեղծել, որոնք ավելի քան երկու դար իշխել են բոլոր մայրցամաքների պարասրահներում և թատրոններում, ասվում է հայտարարության մեջ։
Թանգարանը գտնվում է Zögernitz-ի վերականգնված կազինոյի շենքում, որն իր դռները բացեց Վիեննայի բարձր հասարակության առաջ 1837 թվականին: Այնտեղ մեծ երաժիշտները կատարեցին իրենց ստեղծագործությունները հմուտ հանդիսատեսի առջև:
Մեր օրերում թանգարանը ցանկանում է գրավել նաև երիտասարդ հանդիսատեսին։ Ցուցահանդեսը այցելուներին տեղափոխում է 19-րդ դար։ Սրահներից մեկում ցուցադրված է Էդուարդ Շտրաուսի օրիգինալ դաշնամուրը, իսկ պատերին՝ երաժիշտների կյանքի մասին տեղեկություններ։
«Strauss House»-ը պարզապես թանգարան չէ. Դրանում տեղի կունենան համերգներ, իսկ ցանկացողները կարող են ստանձնել դիրիժորի դերը։ Նախքան վարելու փորձը, նրանք հնարավորություն ունեն չափելու իրենց «վալսի զարկերակը»։
«Դանուբյան վալսի» և «Ռադեցկի երթի», նրանց պարտիտուրների և երաժշտական ստեղծագործությունների մասին տեղեկությունները հասանելի են սենսորային էկրանով։
Մուլտիմեդիա տեղադրման, անիմացիոն գրաֆիկայի և վիզուալ էֆեկտների օգնությամբ բոլորը կարող են ընկղմվել դարաշրջանի ոգու մեջ: Իհարկե, թանգարանին չի պակասում Վիեննայի Stadtpark-ից Յոհան Շտրաուս որդու ոսկե արձանի կրկնօրինակը, որն իդեալական վայր է սելֆիի համար։
«Strauss House»-ի սիրտը պարահանդեսային դահլիճն է՝ Գոթֆրիդ Հելնվեյնի Շտրաուսի դիմանկարով, որտեղ հաջորդ տարվանից համերգներ են անցկացվելու։ Վերականգնողներին հաջողվել է վերակենդանացնել անցյալ դարաշրջանի շքեղությունը մարմարե հատակներով, ճոխ բյուրեղյա ջահերով, օրիգինալ վիեննական Thonet աթոռներով, պաստառներով և առաստաղի որմնանկարներով:
Հետագայում հյուրերը կկարողանան համատեղել թանգարան այցելությունը Շտրաուսի անվան նախաճաշի կամ Շտրաուսի գինու հետ մատուցվող հիանալի ընթրիքի հետ։
Հետաքրքիր մանրամասն է, որ աուդիո ուղեցույցը ձայնագրել է Յոհան Շտրաուս-հոր ծոռը։ Այցի սկզբում կարճամետրաժ ֆիլմում ներկայացված են երաժշտական ընտանիքի կյանքից և այն դարաշրջանից, որտեղ նրանք ապրել և գործել են ամենակարևոր փաստերը: