Почетен текст:
Ние, министрите за надворешни работи на Г7 на Канада, Франција, Германија, Италија, Јапонија, Обединетото Кралство и Соединетите Американски Држави, и високиот претставник на Европската унија, остро ги осудуваме четирите егзекуции од воената хунта во Мјанмар.
Овие егзекуции, први во Мјанмар по повеќе од триесет години, и отсуството на правични судења го покажуваат презирот на хунтата кон непоколебливите демократски аспирации на народот на Мјанмар. Егзекутираните беа истакнати членови на демократската опозиција - демократскиот активист Кјау Мин Ју (познат како „Ко Џими“), поранешниот пратеник во парламентот Фио Зејар Тау, како и Аунг Тура Зав и Хла Мио Аунг. Нашите мисли се со семејствата на четирите жртви и со оние на многу други кои беа убиени, уапсени или мачени во Мјанмар откако војската нелегитимно ја презеде власта во февруари 2021 година.
Продолжуваме најостро да го осудуваме воениот удар во Мјанмар и изразуваме длабока загриженост за политичката, економската, социјалната, хуманитарната состојба и состојбата со човековите права во земјата.
Го повикуваме воениот режим веднаш да престане со употребата на насилство, да се воздржи од понатамошни самоволни егзекуции, да ги ослободи сите политички затвореници и произволно приведените и да ја врати земјата на демократски пат. Ние продолжуваме да ги поддржуваме напорите на АСЕАН и ја повикуваме војската значајно да ги спроведе сите аспекти од Консензусот во пет точки на АСЕАН. Ова вклучува инклузивен процес на дијалог со широк опсег на демократска опозиција. Ние, исто така, продолжуваме да ги поддржуваме напорите на Обединетите нации и охрабруваме ефективна координација помеѓу специјалниот пратеник на АСЕАН и специјалниот пратеник на генералниот секретар на Обединетите нации за Мјанмар.
Завршен текст