Брзото топење на мразот на Антарктикот драматично ја забавува циркулацијата на водата во светските океани и може да има катастрофални ефекти врз глобалната клима, морскиот синџир на исхрана, па дури и врз стабилноста на ледените полици. Ова го предупредуваат научниците цитирани од Ројтерс.
Циркулацијата на океанот, која се состои од движење на погуста вода кон морското дно, помага да се обезбеди топлина, јаглерод, кислород и витални хранливи материи низ целиот свет. Сепак, длабоките океански води од Антарктикот би можеле да се намалат за 40% до 2050 година, според студијата објавена во списанието Nature. „Зачудувачки е што тоа се случува толку брзо“, рече Алан Микс, палеоклиматолог од Државниот универзитет во Орегон и коавтор на најновиот извештај на Меѓувладиниот панел за климатски промени. „Се чини дека феноменот започнува во моментов, а тоа е ударна вест“, вели тој.
Како што се зголемуваат температурите, свежата вода од топењето на Антарктикот навлегува во океанот, намалувајќи ја соленоста и густината на површинските води и намалувајќи го надолниот проток кон дното. Додека претходните истражувања детално разгледуваа што може да се случи со слична нарушена циркулација во Северниот Атлантски Океан, каде што Европа би можела да настрада од топењето на мразот на Арктикот, механизмот на топење на мразот на Антарктикот досега е слабо проучен. Циркулацијата на водата во океанот овозможува хранливите материи да се издигнат од дното, при што Јужниот Океан поддржува околу три четвртини од светското производство на фитопланктон, кој е во основата на синџирот на исхрана, рече коавторот на втората студија Стив Ринтул. „Ако надолното движење на водата во близина на Антарктикот се забави, целата циркулација ќе биде забавена, а тоа ќе го намали количеството на хранливи материи што се враќаат од длабоките океански води назад на површината“, вели Ринтул. Резултатите од студијата, исто така, покажуваат дека океанот повеќе не апсорбира јаглерод диоксид колку што се разредуваат неговите горни слоеви, оставајќи се повеќе и повеќе јаглерод диоксид во атмосферата.
Илустративна фотографија од Pixabay:
