Appoġġ tal-UE għall-Missjoni tal-Unjoni Afrikana fis-Somalja: Il-Kunsill japprova aktar appoġġ taħt il-Faċilità Ewropea għall-Paċi
Wara l-adozzjoni mill-Kunsill f'April 2021 ta' miżura ta' assistenza li tieħu l-forma ta' programm ġenerali għall-appoġġ lill-Unjoni Afrikana fl-2022-2024 taħt il- Faċilità Ewropea għall-Paċi (EPF), il-Kumitat Politiku u Sigurtà illum approva appoġġ addizzjonali għall-komponent militari tal- Missjoni tal-Unjoni Afrikana fis-Somalja/Missjoni ta' Tranżizzjoni tal-Unjoni Afrikana fis-Somalja (AMISOM/ATMIS).
Fl-2022 l-UE se żżid € 120 miljun għar-riżorsi mobilizzati qabel għall-AMISOM/ATMIS fl-2021.
L-appoġġ miftiehem se jikkontribwixxi l-aktar għall-konċessjonijiet tat-truppi tas-suldati Afrikani skjerati, biex il-missjoni tkun tista' twettaq il-mandat tagħha b'mod effettiv.
Appoġġ preċedenti ta’ €65 miljun taħt l-EPF li jkopri l-perjodu mill-1 ta’ Lulju – il-31 ta’ Diċembru 2021 ġie miftiehem f’Lulju 2021.
Sfond
L-UE hija l-akbar kontributur dirett għall-AMISOM/ATMIS, għal ammont totali ta' qrib € 2.3 biljun mill-2007. L-UE hija lesta li tibqa' impenjata mill-qrib u impenjata bis-sħiħ biex tikkontribwixxi għall-attivitajiet tal-AMISOM/ATMIS u tikkonsolida l-kisbiet miksuba s'issa.
F'konformità mal-approċċ integrat tal-UE għall-kunflitti u l-kriżijiet esterni, Il-finanzjament tal-EPF għall-AMISOM/ATMIS huwa element wieħed ta’ impenn usa’, koordinat u koerenti tal-UE biex tappoġġja s-sigurtà u l-paċi fis-Somalja, u fil-Qarn tal-Afrika in ġenerali.
Il-finanzjament għall-komponent militari tal-AMISOM/ATMIS huwa t-tieni azzjoni appoġġata taħt il-miżura ta' assistenza b'appoġġ għall-operazzjonijiet ta' appoġġ għall-paċi mmexxija mill-Afrika, b'valur ta' €600 miljun taħt il-Faċilità Ewropea għall-Paċi li tkopri l-perjodu 2022-2024.
