Il-Kanċillier Ġermaniż Olaf Scholz appella għal Ewropa magħquda li kapaċi tinbidel biex tiżgura postha fid-dinja ta’ għada f’dibattitu mal-MPE.
Fl-indirizz tiegħu Din hija l-Ewropa lill-Parlament Ewropew fid-9 ta' Mejju 2023, il-Kanċillier Scholz saħaq li l-Ewropa għandha responsabbiltà globali lil hinn mill-fruntieri tagħha "għax il-benessri tal-Ewropa ma jistax jiġi sseparat mill-benessri tal-bqija tad-dinja" . Id-dinja tas-seklu 21, qal, "se tkun multipolari, diġà hija".
Scholz identifikat tliet lezzjonijiet għall-UE: “L-ewwel, il-futur tal-Ewropa jinsab f'idejna. It-tieni nett, iktar ma tkun magħquda l-Ewropa, iktar ikun faċli li nassiguraw futur tajjeb għalina nfusna. U t-tielet, mhux inqas iżda aktar ftuħ u aktar kooperazzjoni huma l-ordni tal-ġurnata.”
Biex tiżgura l-post tal-Ewropa fid-dinja ta' għada, l-UE trid tinbidel, qal il-Kanċillier. "Għandna bżonn UE ġeopolitika, UE mkabbra u riformata, u UE miftuħa għall-futur."
Dwar il-gwerra tar-Russja kontra l-Ukrajna, huwa qal li l-UE issa trid tistabbilixxi t-triq għar-rikostruzzjoni tal-Ukrajna. Ukraina prospera, demokratika u Ewropea hija l-aktar ċaħda ċara tal-politika imperjali, revisionista u illegali ta' Putin.
F'dinja multipolari, il-pajjiżi tan-nofsinhar globali huma sħab importanti, kompla Scholz. L-Ewropa trid tqum għas-sigurtà tal-ikel u t-tnaqqis tal-faqar u għandha żżomm il-wegħdiet tagħha ta' azzjoni dwar il-ħarsien tal-klima u l-ambjent internazzjonali.
Fir-rigward tat-tkabbir, il-Kanċillier qal: "Politika ta' tkabbir onesta timplimenta l-wegħdiet tagħha - l-ewwel u qabel kollox lill-istati tal-Balkani tal-Punent." Huwa ħabbar ukoll li jagħmel pressjoni biex it-teħid ta’ deċiżjonijiet b’maġġoranza kwalifikata jiġi estiż għal aktar deċiżjonijiet li jittrattaw il-politika barranija u t-tassazzjoni.
Meta tkellem dwar il-migrazzjoni u l-ażil, huwa qal: "Aħna magħqudin bl-għan li niġġestixxu u nirregolaw aħjar il-migrazzjoni irregolari - mingħajr ma nittradixxu l-valuri tagħna." F’ħafna nħawi tal-Ewropa hemm bżonn ta’ ħaddiema, minn pajjiżi mhux tal-UE, kompla, u jekk l-Ewropa torbot il-migrazzjoni regolari mad-domanda li l-pajjiżi tal-oriġini u tat-tranżitu jieħdu lura wkoll lil dawk li m’għandhomx dritt jibqgħu fl-Ewropa, “mela l- naħat se jibbenefikaw”.
Reazzjonijiet mill-MPE
B'reazzjoni għall-proposti ta' Scholz għar-riforma tal-UE, il-MPE talbu kuraġġ mill-mexxejja tal-Ewropa biex jieħdu l-UE fil-futur u talbu lill-Kanċillier Scholz biex jimbotta għal Konvenzjoni qabel l-elezzjonijiet Ewropej tal-2024. Diversi MPE talbu l-kontinwazzjoni tal-appoġġ għall-Ukrajna fil-gwerra ta’ aggressjoni Russa sakemm tiġi żgurata paċi ġusta, filwaqt li oħrajn ikkritikaw lill-Ġermanja talli pprovdiet appoġġ tard lill-Ukrajna, u lill-UE talli pprovdiet aktar flus lill-industrija tal-armi.
Għadd ta’ MPE saħqu l-importanza li jiġi miġġieled l-impatt ekonomiku fuq iċ-ċittadini Ewropej tal-gwerra Russa fl-Ukrajna u xi wħud appellaw għal leġiżlazzjoni ġdida biex tiġi żgurata ġustizzja soċjali kif ukoll għal riforma tas-suq tal-elettriku tal-UE biex jiġu ggarantiti prezzijiet ġusti. Xi kelliema saħqu fuq l-importanza tat-tranżizzjoni ekoloġika u diġitali tal-Ewropa u talbu aktar investiment f'dawn l-oqsma sabiex l-Ewropa tkun tista' tmexxi skoperti teknoloġiċi.
