’n Veganistiese ma van Florida is daaraan skuldig bevind dat sy haar 18 maande oue seun vermoor het nadat sy hom net rou vrugte en groente gevoer het.
Sheila O'Leary (39) kan lewenslange tronkstraf opgelê word nadat 'n jurie haar Woensdag skuldig bevind het aan die moord op haar kleuter Ezra O'Leary in 2019, het die New York Post berig.
In September 2019, 'n week voordat die ergste gebeur het, het Ezra niks geëet nie, nie opgehou huil nie en feitlik nie geslaap nie. Sy ma het egter nie hulp gesoek nie. En toe sy dit uiteindelik doen, was die seuntjie koud en het nie asemgehaal nie. Die seuntjie het net 7 kilogram geweeg – dit is sewe kilogram onder die gemiddelde.
Sheila en haar man, Ryan O'Leary, het aan die polisie gesê dat Ezra 'n streng veganiese dieet gevolg het, maar ook steeds geborsvoed is.
’n Lykskouing het bevind die seuntjie is aan komplikasies weens wanvoeding dood.
Aanklaers het die ma daarvan beskuldig dat sy versuim het om behoorlike mediese aandag vir haar seun te soek toe sy besef het hy is siek.
“Sy het gekies om sy gehuil te ignoreer. Sy het nie 'n skaal nodig gehad om te sien dat haar kind vel en bene is nie. Sy het iets onmensliks gedoen,” het Sarah Miller, assistent-staatsadvokaat, tydens slotbetoë gesê.
Die egpaar het nog drie kinders: 11, 5 en 3 jaar oud. Volgens die medici is hul toestand ook ernstig. Die hof het Sheila skuldig bevind aan ses aanklagte, waarvoor sy lewenslange tronkstraf opgelê is. Haar man is steeds verhoorafwagtend.
