Məktəbi tərk etmək gündə beş içki qədər zərərlidir
Norveç Elm və Texnologiya İnstitutunun alimləri yaşından, cinsindən, yerindən, sosial və demoqrafik vəziyyətindən asılı olmayaraq, təhsilin ömrü uzadan faydalarını açıqlayıblar. Araşdırmanın nəticələri The Lancet Public Health jurnalında dərc olunub.
Əvvəllər daha yüksək təhsil səviyyəsinə nail olanların digərlərindən daha uzun ömür sürdüyü göstərilsə də, indiyədək bunun nə dərəcədə olduğu bilinmirdi. Tədqiqatçılar müəyyən ediblər ki, vaxtından əvvəl ölüm riski səbəblərindən asılı olmayaraq hər əlavə təhsil ili ilə iki faiz azalır. Altı il ibtidai məktəbi bitirənlərin riski orta hesabla yüzdə 13 daha az idi. Orta məktəbi bitirdikdən sonra risk demək olar ki, 25 faiz, 18 illik təhsil isə 34 faiz azalıb.
Qeyri-sağlam vərdişlərin təsiri ilə müqayisədə məktəbi tərk etmək demək olar ki, gündə beş və ya daha çox spirtli içki qəbul etmək və ya 10 il ərzində gündə on siqaret çəkmək qədər zərərlidir.
Təhsilin faydaları ən çox gənclər üçün olsa da, 50 və hətta 70 yaşdan yuxarı insanlar hələ də təhsilin qoruyucu təsirlərindən faydalanırlar. Bununla belə, iqtisadi inkişafın müxtəlif mərhələlərində olan ölkələr arasında təhsilin təsirləri baxımından əhəmiyyətli fərq aşkar edilməmişdir.
