Tfal mill-klinika pedjatrika mmexxija mill-Vatikan kantaw diversi kanzunetti għas-Santu Missier
Il-Papa Franġisku llum għalaq 87 sena, milqugħ minn tfal li għenuh jonfoħ ix-xemgħa fuq kejk abjad taċ-ċelebrazzjoni, irrappurtat Reuters. Tfal mill-klinika pedjatrika mmexxija mill-Vatikan kantaw diversi kanzunetti lis-Santu Missier u ppreżentawlu bukkett ġirasol.
Aktar tard, f’attività tradizzjonali tal-istaġun tal-Milied waqt l-indirizz tiegħu ta’ kull ġimgħa fi Pjazza San Pietru, bierek figurini żgħar tat-tarbija Ġesù miżmuma mit-tfal li mbagħad ipoġġuhom fi djarhom.
“Happy birthday” (Buon Compleanno bit-Taljan), għajjat l-għexieren ta’ tfal żgħar fil-pjazza, b’kartelluni bl-istess tislima.
Il-Papa Franġisku twieled Jorge Mario Bergoglio fis-17 ta’ Diċembru 1936, fi Buenos Aires, l-Arġentina, minn ġenituri immigranti Taljani. Fit-13 ta’ Marzu 2013, il-kardinali eleġġuh l-ewwel Papa mill-Amerika Latina.
Il-Prim Ministru Taljan Giorgia Meloni sellem ukoll lis-Santu Missier b’post fuq il-pjattaforma X, sa ftit ilu Twitter, u rringrazzjat għall-“impenn qawwi tiegħu għall-paċi” madwar id-dinja.
Ritratt Illustrattiv minn Javon Swaby: https://www.pexels.com/photo/white-and-beige-concrete-building-during-nighttime-2762485/
