Mookameli-Kakaretso oa Mokhatlo oa Lefatše oa Bophelo (WHO) ka Laboraro o bontšitse tlhokahalo ea ho tšehetsa limilione tse tobaneng le tlala le maloetse Lenakeng la Afrika.
Ho bua ho tsoa Geneva, Tedros Adhanom Ghebreyesus itse komello, likhohlano, phetoho ea maemo a leholimo le ho eketseha ha litheko tsa lijo, mafura le manyolo, kaofela li kenya letsoho ho hlokeng lijo tse lekaneng.
Linaha tse amehileng ke Djibouti, Ethiopia, Kenya, Somalia, South Sudan, Sudan le Uganda.
“Tlapa le khaello ea phepo e nepahetseng li kotsi ka ho toba bophelong, empa li boetse li fokolisa tšireletso ea ’mele, ’me bula monyako wa mafu e kenyeletsang nyumonia, maselese le k’holera,” a hlalosa.
Tedros o re koluoa e qobella batho ba bang ho khetha pakeng tsa ho lefella lijo le tlhokomelo ea bophelo bo botle, Ba bangata ba falla ho ea batla lijo, e leng se ka ba behang kotsing ea mafu.
WHO e fane ka chelete e fetang $16 milione ho tsoa letloleng la maemo a tšohanyetso ho sebetsana le litlhoko, empa ho hlokahala tšehetso e eketsehileng.
Setsi se etsa boipiletso ba $123.7 milione e tla sebelisoa ho thibela le ho laola mafu a seoa, ho phekola khaello ea phepo e nepahetseng, le ho fana ka litšebeletso tsa bohlokoa tsa bophelo bo botle hammoho le meriana.
Boipiletso bakeng sa Tigray
Tedros o itse komello e eketsa "koluoa e bakiloeng ke batho" sebakeng sa Tigray se ka leboea ho Ethiopia, moo ntoa e bileng teng ka lilemo tse ka bang peli.
O ile a re batho ba ka bang limilione tse tšeletseng ba lika-likelitsoe ke mabotho a Ethiopia le Eritrea, "ba koaletsoe linaheng tse ling, ho se na mehala ea puisano, ho se na litšebeletso tsa banka le motlakase o fokolang haholo le mafura."
Ka lebaka leo, ba tobane le mafu a mangata a kang malaria, anthrax, k'holera, letšollo le mafu a mang.
“Bokhopo bona bo ke keng ba lekanngoa bo tlameha ho fela. Tharollo feela ke khotso,” ho boletse Tedros.
Qetellong ea puisano, o ile a etsa boipiletso ba hore ho be le tlhokomelo e kholo ea lefats'e ka boemo ba Tigray.
"Nka u joetsa hore koluoa ea batho ba Tigray e feta (ka) Ukraine, ntle le ho fetelletsa letho. Mme ke boletse dikgwedi tse ngata tse fetileng, mohlomong lebaka ke mmala wa letlalo la batho ba Tigray”.
Boitokisetso ba nyutlelie Ukraine
Hape kopanong:
Ofisiri e kholo ea WHO e totobalitse boitokisetso ba setsi sena ho arabela ketsahalong efe kapa efe e ka bang teng ea nyutlelie Ukraine.
Dr. Michael Ryan, Motsamaisi e Moholo, o ne a araba potso ea moqolotsi oa litaba mabapi le boemo bo ntseng bo mpefala ho potoloha Setsi sa Matla a Nyutlelie sa Zaporizhzhia.
WHO e 'nile ea ameha le ba boholong Seukraine ho tloha qalong ea ntoa, o ile a re, ho akarelletsa le International Atomic Energy Agency (IAEA).
"Re lula re buisana le IAEA 'me re lula re le malala-a-laotsoe re le setho sa tsamaiso ea Machaba a Kopaneng ho arabela, haeba ho na le tlhokahalo ea ho itšoara," ho boletse Ngaka Ryan.
“Ho hlakile hore kotsi ea nyutlelie e ka ba tlokotsi maemong, bophelong ba batho le tikolohong, kahoo re lula re tšoenyehile ka seo. Re tataisoa ke basebetsi-'moho le rona ho IAEA, 'me re tla tsoelapele ho fana ka tšehetso ea karabelo ea bongaka ho bona le ho Mmuso oa Ukraine. ”
