Deur Nathan Morley - Palestynse jeugdiges het Vrydag met Israeliese polisie in Jerusalem se Al Aqsa-moskee-kompleks gebots.
Hierdie terrein in Jerusalem se Ou Stad het woedende tonele gesien toe 150 Palestyne gewond is in botsings met Israeliese onlustepolisie ná dagbreekgebede.
Die Palestynse nuusmedia het berig baie is deur rubberbedekte koeëls beseer; skokgranate, en slae met stokke.
Ná die botsings het die Israeliese polisie gesê dat hulle by die moskee ingetrek het om 'n skare Palestyne uiteen te jaag wat vuurkrakers en klippe geslinger het.
Minstens drie polisiebeamptes is volgens veiligheidsdienste beseer, terwyl honderde Palestyne aangehou is.
Die polisie en weermag in Israel was op 'n hoë gereedheidsgrondslag ná 'n reeks dodelike Arabiese straataanvalle die afgelope twee weke regoor die land.
Spanning hierdie jaar het deels toegeneem deur Ramadan wat saamgeval het met die Joodse viering van Pasga.
Die heilige plek – wat in die hartjie van ou Jerusalem lê – word deur Jode vereer as die heiligste plek in Judaïsme, en aan Moslems bekend as een van die drie heiligste plekke in Islam.
In 'n boodskap aan die pers het die Palestynse Owerheid die Israeliese optrede veroordeel, en die Jordaanse nuusagentskap, Petra, het berig dat owerhede in Amman dit as 'n 'flarante oortreding' beskryf het.
Laat Vrydag het 'n groot groep buite 'n moskee naby die Israeliese ambassade in Jordanië bymekaargekom om hul solidariteit met die Palestynse mense te betoon.
Geweld het die afgelope paar jaar dosyne kere op hierdie terrein opgevlam.
Afsonderlik, sê Washington is diep bekommerd oor geweld. In 'n verklaring het Ned Price, woordvoerder, 'n beroep op alle kante gedoen om selfbeheersing te beoefen, uitlokkende optrede en retoriek te vermy, en 'die historiese status quo op die Haram al-Sharif/tempelberg te bewaar'.
