Imibhikisho iqale kulokho abantu abaningi baseKenya abakubheka njengokunyuswa kwentela okungafanele kanye nokwenyuka kwamandla emali ezweni, ngokwemibiko yezindaba.
OHCHR Okhulumela uJeremy Laurance ukhiphe isitatimende egxeka udlame, ezwakalisa ukukhathazeka "ngezinsolo zokusebenzisa amandla kungenasidingo noma ngokungahambisani, okuhlanganisa nokusetshenziswa kwezibhamu, ngamaphoyisa".
Imibiko ilinganisela ukuthi isibalo sabantu abashonile sifinyelele ku-23, kanti inqwaba yabalimala ngesikhathi kuqhubeka imibhikisho.
Umholi weqembu eliphikisayo eKenya kubikwa ukuthi ucele ukungalaleli komphakathi kanye nemibhikisho ezweni lonke emelene noHulumeni, phakathi nokukhuphuka kwezindleko zokuphila kanye nokukhathazeka ngokukhula kokungalingani.
Amaqembu aphikisayo athi ukwenyuswa kwentela kwakamuva uHulumeni athi kwenzelwe ukukhokhela izikweletu kanye nokuxhasa ukwakhiwa kwamathuba emisebenzi, kwenyuse umthwalo wentela emindenini esivele idonsa kanzima ukuthola izidingongqangi futhi kubikwa ukuthi ifuna ukuqhubeka nemibhikisho ephikisana nezinqubomgomo ezintsha.
Uphenyo ngokushesha
"Sicela ukuthi kwenziwe uphenyo ngokushesha, olunzulu, oluzimele, nolusobala mayelana nokufa nokulimala", kusho uMnu. Laurence. “Abathintekayo kumele baphendule. Kufanele kuthathwe izinyathelo ezisebenzayo zokuvimbela ukufa nokulimala okwengeziwe. ”
Ilungelo lokubhikisha ngokuthula liqinisekisiwe ngaphansi komthethosisekelo waseKenya, nakuba iziphathimandla kubikwa ukuthi zimemezele imibhikisho yakamuva "engekho emthethweni" futhi zithi ibeka engcupheni ukuphepha kwezwe.
Ilungelo lokuhlangana ngokuthula
“Sicela iziphathimandla ukuthi ziqinisekise ilungelo lokuhlangana ngokuthula njengoba kuqinisekiswe uMthethosisekelo waseKenya nomthetho wamazwe ngamazwe wamalungelo abantu,” kusho uMnu. Laurence.
"Sinxusa ukuthi kube nomoya ozolile futhi sikhuthaze inkhulumomphendvulwano evulekile ukuze kubhekwane nezikhalazo zenhlalo, ezomnotho, nezombusazwe, ngenhloso yokuhlonza izixazululo ezihlala njalo ukuze kuzuze bonke abantu baseKenya," engeza.
